الخميس، 14 أبريل 2011

يا ريس

الحكايه م البدايه         هو فيه ايه ليه عملت اللى عملتوا       وليه نسيت اللى انت قلته 

اول ما جيت قلت  هى مده        ولو زادت راح تبقى تانى مده       واللى يفشل فى الاولانيه       اهو يعوض بقى فى التانيه

قلنا والله ياريس  كلامك جميل ومساوى      صدقناه وقلنا والله انت ناوى     تجيب الخير وتداوى وح تعمر مصر        لو غاوى 

قلنا وياك      وبينا ح تعلى الغناوى ونبدأ الصحوه وتيجى البسمه  يلا حط ايدك فى ايدينا يلا ناول     خد وحاول خد عرقنا خد دموعنا   
بس لازم تفتكر زى ما بتاخد  يوم ح تدى وزى ما شدينا الحزام  ييجى يوم فيه ح نرخى  وزى ما عشنا الظلام  الفجر جاى جاى بيجرى

والنور فيه يبقى تمام  تمام تمام كله ياريس كان تمام 

شدوا الحزام   شدوا الحزام  شدينا  شدوا كمان شدينا      شدينا ياريس واتارينا  بنشد لوحدينا وانت ياريس ناسينا وبقينا نشد ونسينا

ومن كتر الشد اتعرينا وبان العضم وخلينا  الجلد يادوب ساتر   لينا وانت ياريس ناسينا نسيت     ونسيت ونسيت كل اللى كان 

نسيت البلد  والاهل والخلان  نسيت      ونستنا     افرحنا كمان      سودت ايامنا  وسننا كمان        السنه دى سودا واللى جايه كمان 

كنت بتقولها  صراحه      واللى يسمعها يقول والله الراجل غلبان       محنا بنكتر كل يوم     اولوفات والاكل والشرب يدوب  فتات 

وبلاش بقى الهات هات  لازم نحاول ندى       وندى وندى والحزام ع البطون ينشد  

كدبنا كتير كل اللى قال دا بلدنا بتتسرق     بيسرقها فلان وفلان  

واللى كان طبال ولا رقاص      اصبح معاك وزير ورجل اعمال 

حكمت فينا اللى مايسوى واللى عمره ما كان له ميزان      عملنا ايه فيك دااحنا صدقناك وشدينا الحزام ومشينا جنب الحيط 

مش جبن ولا خوف بس عشان البلد تنعان 

اتاريك ياريس زعيم عصابه وحواليك حيتان وغيلان 

اللى يقرب        اللى يبص      اللى يفكر      ياعينى عليه دا راح فى خبر كان      اسمه كان ايه والله اتمسح الاسم من الوجدان 

شياطين امن الدوله غيروا  الاسم  من سامى لساميه      غيروا الاسم والمعالم      وف الاخر نفخوه  وكله تمام 

عملنا ايه ياريس     ما انت كنت زمان واحد مننا      واللى قلته لنا صدقناه  

النهارده انكشف مستورك     والمستخبى بان  عقدك خبتها علينا       واتريك تعبان 

سودت علينا الدنيا      وانت بتاكل  كفيار وسيمون فاميه      وحاجات كتير ما اعرفش ااقولها     ولا بتيجى منين 

ولما تجوع ياحبه عينى      مكسيم منه الاكل بال 130سى حربيه طياره لسيادتك     طياره للست      طياره بفلوسنا الطياره 

والمصيبه كمان عايز يجلنا من بعدك اهبل بزماره         افتكر يا كبد امه انه عشان ابنك      يبقى علامه     لا تقولى زويل

ولا البرادعى      ولا محفوظ     يا الف خساره      تاجر بديونا     وباع قوتنا    وجابله قزم بحماره      عشان لما يقف جنبه 

يتغر يا خساره    القزم من خبته افتكرها  مغاره       وعلى بابا على بابها فى ايدوا سناره         والست هانم  بتحلم 

اهبلها يحكم المغاره     كنوزها متاحه       تفاحه      ياكلها اللى عايز براحته      وبالراحه      لا ليها صاحب     ولاحاجب

يقول كفايه يا خلق   والخلق فى الشوارع ماتوا     فى طابور العيش    فى زنقه الانابيب     تحت عجل اتوبيس   سواقه مش شايف 

مهو يدوب  شرب شايه     وكل سندوتشه     وبقالوا فى السهرى يومين    مطبق الورديه    يبقى يشوف منين   وسع ياراجل وانتى يا وليه 

واللى مش خايف    اه    بناقص واحد    يا اخى قول ميه     خلى المغاره تزيد لغيرى   مش ليا   اللى كتبته دا جزء من حكايه مصريه 

علي بابا والاربعين الحراميه     بدأتها النهارده      وبكره ان عشت راح اقول البقيه    بس ادعولي ألاقى القلم والورق ولا يسرقوش حراميه 

مهم كتير    واكتر من الهم على القلب      والقلب تعب من قلة الملاغيه     اتلغى منه الحب ومبقاش غير الغلب والندم على الحنيه 

بكره نحكى بقيه حكايه الحراميه
    
abuiyad

هناك تعليقان (2):

  1. فارس الكلمة.........
    الله عليك وعلى كلامك .... هزتنى والله أنغامك
    فكرتنابالزمن الجميل....اللى فيه شمس الأصيل
    واللى كنا نلعب بحرية...ونجرى ورارش العربية
    الله عليك والله ياصلاح... يسلم قلمك وأصالة الفلاح
    المهندس فاروق غبد الحفيظ
    فاروق بن النيل

    ردحذف
  2. فارس الكلمة صلاح ......
    أحييك على هذن الرائعة وإسمحلى أن أنقدها :
    1- فكرة القصيدة أو الأغنية مبدعة ( على بابا والأربعين حرامى ) ربطت بين الماضى والحاضر
    2- إختيارك للكلمات بدقة وسلاسة وبساطة ونغم وإتساق
    3- إستخدامك لأسلوب الشئ وضده للتوضيح زادالمعنى وضوحا و بداعة ( الكافيار والعيش والطابور- السيارة والطيارة- الترف والنعيم والتخمة وشدالحزام للحظام بلا رحمة......إلخ
    4- سردك للأحداث بتسلسل كحكايات ألف ليلة وليلة
    5- إعطاء القارئ جرعة مكثفة من البداية ليتتبع الحكاية وتربطه بها بوثاق شديد
    6- حتى أحداث الحاضر ألقيت عليها ظلك "والمصيبة كمان عايز يجيلنا من بعدك أهبل بزمارة"
    7- ذكرك لعلماء حصلوا على جوائز نوبل ولم يستفد منهم على بابا الريس
    7- بس بأعترض على :السنة دى سودةواللى جاية كمان
    8- أطلب أن تختار عنوان للقصيدة يليق بها
    9-القلم حاتلاقيه بس ياترى الألم حايخليه يقدر يكتب
    10-السواقين بمصر موش حايتغيرواالبركة بالجيل الجديد
    تسلم ويسلم قلمك يافارس الكلمة ومنتظرين المزيد
    أخوك: المهندس / فاروق عبد الحفيظ سحير
    الشاعر المهندس/ فاروق بن النيل

    ردحذف